سهرة الجمعة_ حصاد سريع لموسم مش سعيد وحاسب ليغفلونا

الكاتب : محمد أشرف 5 يناير، 2019 151

 

إنتهي موسم ٢٠١٨ الذي كان له الفضل علينا في أن نري أشياء لم نكن نراها من قبل في مصر ولكن للأسف كانت النهايات الحزينة هي العنوان الرئيسي لكل الأحداث التي فرحنا أننا رأيناها… شكلك مش فاهم ؟ تعالي أقولك

الحكاية بإختصار إبتدت بإن مبروك عليك ياوزير الرئاسة الشرفية إيه ده صفقات جهنمية وستاد كمان ليا ؟ حلو الكلام ده محبين الأهلي دايماً حركاتهم مثالية بس هو السؤال عبدالله السعيد ده ليه ولا ليا! لأ ياوزير ماتفقناش عالأمور الصيبيانية انا كده مضطر أقولك سلام ،، ياوزير ياوزير سيبك منه تعالي وانا هديك رئاستين شرفية بس ممكن في مدرب جميل كده ليا ؟ ولاعب أو إتنين نحلي بيهم عيون الجمعية العمومية ومبروك ياوزير سمعت إنك إشتريت نادي ويابن الإيه عملتها إزاي دي كلمت البدرى وهادي دول ولاد النادي ! بس عظيم والله لاهبعتلك لاعيبة قد ولادي .

ياخسارة ضاع التعادل مش مهم لسه في ماتشين بس إيه ده هو ليه اللاعيبة طالعة من الماتش زعلانة ؟ إتصرف يابني أدم وإلحقهم بالفنانة و مش مهم نخسر كمان ماتش روسيا أصل هي البلد اللي مستيضفانه و ماتزعلوش خلاص هناخد ال٣ نقط أكيد من البلد جارتنا اللي بنسافرلها كل عيد و بحساباتنا اللولبية هنتأهل من المجموعة ديا بس إيه ده إيه إيه ده إيه ده ياسعودية ؟ خلاص خلاص مش مهم هنرجع وهناخد حقنا بس بعد ال٢٨ سنة اللي جاية.

الله قناة جديدة لنادي جديد هو ده الإستثمار في الكورة ولا بلاش! رونالدينهو وكين وجون تيري أكتر من كده بليز ماتفاجئوناش ومش لازم تخليه يقول قفشة أحسن رئيس النادي يتصل ويعمل منك عالهوا جلاش إقفلوا القناة خلاص بقي ماتصدعوناش.

ومع القناة اللي فوق في قنوات جديدة وإعلاميين شداد سيد عبد الحفيظ قال نكتة جنان وأحمد الشريف ماله كده سهتان ؟ و أحمد جمال إعلامي إزاي ياجدعااان وياعبد الناصر يازيدان هتفضل كتير كده من مرتضي زعلان طب ورأي مدام سميرة إيه كمان! وشوبير لو خلي الضيف يقول جملتين ورا بعض من غير مايقاطعه يخرج زعلان أما كابتن مدحت فهو رجع النيل عشان طبعاً هي أم القنوات من زمان.

وأكيد مش هننسي الحاج عامر حسين الخارج عن كل التوقعات هو راجل طيب وغلبان بياكل بقسماط بلبن قبل ماينام عيبه الوحيد إنه رئيس لجنة المسابقات بس هو أصلاً فشل في كل الحسابات بس بيعشق المؤجلات وياااه لو في ملغيات هيبقي هم وراح وتعب وانزاح وأخيراً هيبقي مرتاح وربنا يكون في عونك ياحاج عامر ياللي أكيد من غيرك إحنا تفاح.

لا تعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *