الدوري الممتازفيديو

حسام عاشور يثير الجدل بفيديو له عبر إنستاجرام

نشر منذ قليل لاعب خط وسط النادي الأهلي، حسام عاشور مقطع فيديو علي موقع التواصل الاجتماعي إنستجرام، موضحًا فيه موقفه مع تركي اَل الشيخ وإدارة الأهلي، وإنه يطلب بحقه في إقامة ماتش إعتزال يليق به.

وقال عاشور : “الفترة اللي فاتت كان هناك غلط كثير وأنا مش بعمل فيديوهات خالص بس كان لازم اطلع واتكلم ، الناس كلها عارفة قيمة حسام عاشور ، وعارفه تاريخه وعارفين إنجازاتي مع الاهلي انا بقالي 16 سنه مع الاهلي وبعمل شغلي على اكمل وجه وعمري ما عملت مشكلة ولا صوت وبطلع كل ال جوايا للأهلي وبكل طاقتي”.

وأكمل :” معلش انا متاَثر شوية والضغط عليا كبير الفترة اللي فاتت، أنا هحكي لكم الموضوع كله باختصار، انا عمري ما طلبت من الاهلي حاجه ولا عمري طلبت اطلع برا زي اللي بيطلعوا عشان ماديات، كان مدير الكورة بيقولي تعالى أمضي على بياض باجي أمضي، وعمري ما طلبت حاجة”.

وأضاف عاشور :”قالولي إنت هتطلع برا تعمل معايشة مع أي نادي، الموضوع كان صعب جدا لاني عندي 34 سنة ولسه قادر أدي، فوافقت بعد تفكير كبير جدا، وقالولي في الاهلي بشكل رسمي اني اظبط مع المستشار تركي الشيخ عشان يعملي ماتش إعتزال وتواصلت معاه”.

وتابع حديثه :” إتقالي هيتعملك ماتش إعتزال يليق بكابتن الأهلي وتاريخه وتم إتفاق ثلاثي مع المستشاز ومحمد العاصي، واستاذ جمال جبر قالي اكتب ورقه واستاذ سيد عبد الحفيظ واستاذ مرجان ورقك بتفيد إن الاهلي هيلعب الماتش أول إمبارح”

وأوضح عاشور :”واتفقنا علي كل حاجه وعملت فيديو أشكر فيه تركي والجهاز واللعيبة وبعته للنادي وللمستشار، كان الساعة 5 عشان يتم الرتوش الأخيرة، ومحمد العاصي طلب جواب الشكر عشان نظبطه، كان الساعة 8 واستاذ جمال رد وقال أصل كابتن محمود الخطيب مبيردش أضله مسافر في الساحل ومرة عشان حفيده تعب وراح المستشفى، ربنا يعافيه”.

وأكمل :” أقسم بالله ده اللي حصل، خليكوا مع الطرف التاني المستشار، اشمعنا جيتوت علي اَخر خطوة وعملتوا كدا، الناس كلها عارفة قيمة حسام عاشور وعارفة ان عمر ما طلع مني لفظ، محدش متضرر غير حسام عاشور”

وأضاف :” أنا عاوز الماتش يتطلب، انا مش بتمني حاجه تاني انا وافقت علي طلبات النادي وبطلت كورة مع اني قادر ومعنديش مشكلة، انا عاوز الموضوع يمشي وده حقي، انا ماليش دعوة بحاجة انا ده حقي وعاوزه حق اللي قدمته للاهلي، وعاوز كل حاجه تمشي ببساطة”.

وتابع :”المستشار مشكورا متكفل بكل حاجه من الألف إلى الياء ومقصرش في حاجة ومتفق مع النادي الأهلي يعني معملتش ده من دماغي، الماتش كان سواء في اسبانيا او السعوديه كان هيجيب طيارة خاصة تاخد الجهاز كله وترجعه”.

وأتم لاعب الأهلي :” يعني في مصلحة مين كل ده، اكيد مش في مصلحتي انا اكثر حد متضرر، انا عاوز ماتش الاعتزال بتاعي يتلعب زيي زي أي حد، انا مش عارف انا بتشتم ليه، ايا كانت الخلافات انا فين من كل ده، وبعتذر عن عصبيتي بس ده من حرقتي، انا ده حقي حق اللي قدمته للاهلي وديه ابسط حاجة ليه الشتيمة وليه الضغط ده كله”.

ويذكر أن حسام عاشور نشر فيديو بالأمس يشكر فيه تركي اَل الشيخ علي تقديم المساعدة له وقرر إعتزاله كرة القدم نهائيًا.

 

 

عنان رضا

كاتبة صحفية لأخبار النادي الأهلي والأخبار العالمية وأخبار المحترفين

مقالات ذات صلة

زر الذهاب إلى الأعلى