تحدث حارس مرمى النادي الأهلي السابق، كابتن احمد فوزي لموقع “كورة نيو” في تصريحات خاصة موضحًا رده حول الشائعات التي تناولها البعض في الفترة الأخيرة على لسانه، ويُبدي اَرائه حول اَخر التطورات بالنادي الأهلي وإستئناف الدوري.
وعن إستكمال الدوري من إلغائه وقرارات الأندية، أجاب فوزي حارس مرمى الأهلي السابق : “ده قرار دولة، ومن الممكن ظهور كورونا مرة اَخرى بعد 4 أو 5 أسابيع وتحصل موجة ثانية، ونضطر نلغي الدوري ده واللي جاي، فبدل ما اعمل كده أكمل الدوري ده وأشوف إيه هيحصل”.
وتابع : “ديه إستراتيجيات دولة، حوالي مليار جنية من ناحية الإعلام والتليفزيون والإعلانات وكل ده، والعالم كله وأكبر الدوريات كملت إشمعنا إحنا”.
وعن قرارات الأندية : “هي قرارات أهواء، دوري الثانية والثالثة لا يجب عودتهم لكن الممتاز لابد رجوعه لإنه وجهه للرياضة المصرية كلها، ومش كل واحد خايف يهبط أو مش عاوز يدي فلوس للاعيبته ويضحك عليهم ويقولهم كفايه عليكم ال 50% وده الغالب واللي اندية كتير هتعمله وبالفعل عملته، يطالبوا بإلغاء البطولة، مثلًا نادي مثل الرجاء باع النادي وقعد لاعيبته في البيت!”
وعن ما يتناوله البعض علي لسان كابتن احمد فوزي، أوضح : “هذا كذب وافتراء بيّن وصحافة صفراء، حد يقولي قولت الكلام ده إمتى وفين ويطلعهولي واللي ملأ الدنيا صراخ بإن النادي الأهلي فيه حالات إصابة بكورونا، لديه قلة حيلة وهذا ليس جديدًا على بعض الصحفيين”.
وعن صفقة طاهر، أضاف : “صفقة طاهر الناس تتكلم عنها زي ماهي عايزه، المهم اللاعب هيعمل إيه في ارض الملعب، طاهر يعتبر صفقة تحضيرية لغياب رمضان صبحي الموسم القادم ولسه حوالي 4 شهور قبل بداية الموسم الجديد هيكون اللاعب قدر يشرب طباع الأهلي”.
وأكمل : “اللاعب أخلاقيًا ومهاريًا يليق بالنادي الأهلي، لأن مش أي لاعيب يلبس الفانله الحمراء يمشي معاها والعكس صحيح، لما أبو تريكة جه الناس مقالتش عنه حاجة بالعكس، لكنه بقى أهم لاعب في مصر، وناس كتير إتكلمت عن لاعيبه داخل النادي الأهلي إنهم هيكون لهم شأن ومكملوش سنة ومشيوا”.
وتابع : “المهم اللاعب هيعمل إيه وهيكون تفكيره ناحية الكورة وإنه يديها ولا لا، وبعد ذلك نقرر وسعر الصفقة أو الصفقات بشكل عام طبيعي جدًا وكل سعر على حسب المنتج”.
وعن قرارات الأهلي تجاه تركي اَل الشيخ وحسام عاشور، أتم حارس الأهلي السابق حديثه : “قرارات الأهلي هذة من أفضل القرارات على مدار اَخر ثلاثة سنوات”.
