في البداية عايزين نعرف كيف ترى ثقة أرسنال في محمد النني .
أرسنال بقت بتعتبر محمد جزء من العيله بتاعها وأنا كنت هناك وشوفت الكلام ده، وبيحبوه هناك جدًا، كل الناس بتحبه عشان بيعمل حاجه كويسة في الفرقة وهو أكبر ساند ليهم حتى وهو علي دكة البدلاء .
طبعًا كلنا بنتمني إن محمد يقوم بالسلامة ويرجع يكسر الدنيا تاني .. كنا عايزين نعرف تفاصيل إصابة محمد وميعاد عودته .
بإذن الله هيرجع قريب وإصابته ستنتهي في الشهرين القادمين وهو عنده إصرار أنه يرجع بسرعه .
شايف ازاي علاقة محمد النني بمحمد صلاح؟ وشايف إن العلاقة زمان كانت أقوي من دلوقت ولا لأ ؟
العلاقة بين محمد صلاح وبين محمد كويسة جدًا ومش صلاح بس ده تريزيجيه وحجازي في ناس بتبقى شايفه أن هما بعيد عن بعض لكن هما بيحبوا بعض جدًا وكانوا مع بعض في منتخب الشباب والأوليمبي ومع بعض بقالهم سنين .
هل ممكن نشوف محمد بيختم مسيرته في النادي الأهلي .
أمنية أي حد أنه يختم مسيرته في الأهلي، هو اتربى في الأهلي، والنادي الأهلي بالنسبالنا حاجة كبيرة وبنحب النادي الأهلي، بس أنا أتمنى أن محمد يختم مسيرته في الأرسنال ويبقى مدرب معاهم كمان في نادي كبير وعريق زي الأرسنال بس في النهاية برضو نفسي يحقق أمنية والدته الله يرحمها ويلعب في الأهلي .
شايف ايه علاقة محمد بزمايله في أرسنال .
أنا كنت مع محمد وهو بيجدد، حلاوة نادي أرسنال إنك تحس إنك في بيت عيلة من بتوع زمان، كلهم بيحبوا بعض وبيشجعوا بعض وعلي تواصل دائمًا .
محمد عقده هينتهي مع أرسنال في شهر يونيو العام القادم لو محمد مجددش مع أرسنال تتمني تشوفه فين ؟
أتمني يفضل في نادي الأرسنال، هو بقاله 7 سنين معاهم، وشايف الناس كلها بتحبه وربنا يكرمه إن شاء الله .
ايه العلاقة اللي بتربط بين ميكيل ارتيتا المدير الفني لأرسنال وبين محمد .
ميكل أرتيتا بيحب محمد وشايفه قائد للفريق وبياخد رأيه دائمًا .
ميكل ارتيتا مدرب لارسنال من 4 سنين وهو حاليًا عنده 40 سنة يعني بدأ تدريب من وهو 36 سنة مع نادر كبير زي ارسنال .. ليه عندنا في مصر اللاعيبة لما بتعتزل بيدخلوا مجال التدريب متأخر .
أرتيتا كان بيلعب مع محمد، هناك بيعمل دراسات من وهو صغير في التدريب، وبيأهل نفسه بدري عشان يبقي مدرب، عندنا تلاقي اللاعب يقولك لما أعتزل أبقى أفكر، محمد بيكتسب خبرات من أرتيتا عشان لما يعتزل يبقي فاهم .
محمد حريص علي التواصل مع أصدقائه القدام ولا لأ ؟
محمد حريص علي مقابلة أصدقائه القدام وقال كذا مره إنه فخور إنه اتربى في المحلة وفي منطقة أبو شاهين خاصة .
شايف إن الأهلي هيقدر يتأهل للدور القادم بدوري أبطال أفريقيا ولا لأ .
بإذن الله الأهلي هيعدي الهلال وهو دايمًا معودنا أنه بيبقي كويس في المواقف الصعبة دي وبتمنالهم التوفيق .
شايف ايه مستقبل “مالك محمد النني” ؟
مالِك هيبقي حاجة كبيرة أوي الصراحة، ومحمد بيجهزه إنه يبقي في أوروبا من بدري وإن شاء الله هو كمان يمضي في الأرسنال ويكمل مسيرة أبوه .
