لا صوت يعلو فوق صوت القمة، المباراة التي تحبس أنفاس الملايين وتوقف الزمن بين الأهلي والزمالك، حيث التاريخ يكتب من جديد في كل مواجهة، وحيث الجماهير تملأ المدرجات بصرخات تهز القلوب قبل العقول، قمة لا تعترف بالحسابات، ولا تلتفت لجدول ترتيب أو أرقام، فالمستطيل الأخضر وحده هو الحكم والفيصل.
وفى خضم هذه الأجواء الملتهبة، كان لنا هذا الحوار الخاص مع محمد رزق – مستر أسيست، نجم الأهلي السابق وأحد اللاعبين الذين تركوا بصمة قوية فى مباريات القمة، بعدما خاضها بجدارة دون أن يعرف طعم الخسارة أمام الزمالك، رزق يفتح قلبه لـ”حوار القمة”، ليحكي عن الذكريات التي لا تُنسى، الرهبة التي يعيشها اللاعبون، أسرار المواجهة المنتظرة، ومن اللاعب الذي قد يكون كلمة السر فى 90 دقيقة تشعل الدوري المصري، وتوقعاته للمباراة، وأشياء كثيرة داخل الحوار.
إيه أكتر ذكرى لسه محفورة فى دماغك من ماتشات القمة؟
رزق: المباراة الأولى مع النادي الأهلي وكأس السوبر المصري، الحمد لله، دا كان أهم حدث بالنسبة ليا فى مباريات القمة، والحمد لله لعبت 5 مباريات ضد الزمالك من غير أي خسارة مع الأهلي.
هل فعلاً ماتش القمة بيكون له رهبة مختلفة عن أي مباراة تانية؟
رزق: أكيد طبعًا بيكون له رهبة، خصوصًا فى وجود الجماهير. لكن المباريات الكبيرة دي بتظهر المعدن الحقيقي للاعب.
مين أصعب لاعب واجهته من الفريق المنافس فى ماتش قمة؟
رزق: طارق حامد أصعب لاعب وجهته.
إيه أكتر ماتش قمة شفته عمره ما هيتكرر؟
رزق: بالنسبة ليا 6/1، وكمان مباراة 3/3 من أقوى وأمتع المباريات اللي شوفتها.
إزاي شايف القمة المرة دي من الناحية الفنية؟
رزق: فيه تفوق نسبي للزمالك بسبب حالة عدم الاتزان اللي بيمر بيها الأهلي، لكن إن شاء الله دا يكون دافع إيجابي لمصلحة الأهلي واللاعيبة الرجالة اللي عنده.
إيه نقاط القوة ونقاط الضعف عند الأهلي والزمالك؟
رزق: الأهلي مشكلته فى ضياع الفرص واستقبال أهداف بسهولة، لكن قوته فى شخصيته اللي لازم تظهر فى الملعب، مع الدعم الجماهيري الغير محدود ودا الدافع الأول، أما الزمالك ففنيًا منظم وأجهز حاليًا، لكن برضه عنده مشاكل دفاعية بتبان فى الأوقات الحرجة.
لو حطينا الكفتين على الميزان: مين الأجهز بدنيًا وفنيًا دلوقتي؟
رزق: فنيًا وبدنيًا ممكن الزمالك، وده باين من وضع الفريقين فى الجدول، لكن الأهلي دايمًا صعب يرجع لفترة تراجع بعد ما يتخطاها، وإن شاء الله دي تكون تكملة للانتصارات.
مين اللاعب اللي ممكن يكون مفاجأة الماتش ويخطف الأنظار؟
رزق: فى الأهلي شايف عبد القادر وشريف، ومن الزمالك بن شرقي، عبدالله جمعة، صبحي وناصر.
لو الماتش خلص تعادل مين الفريق اللي هيتضر أكتر؟
رزق: الزمالك، لأنه هيكون مؤشر سلبي بعد تعادل الجونة، أما الأهلي فى المقابل راجع من فترة تخبط، وأي نتيجة غير الخسارة تعتبر إيجابية ليه.
هل تتوقع إن القمة هتغير شكل المنافسة على الدوري؟
رزق: لسه بدري على الحسم، زي الموسم اللي فات، كله كان بيقول الأهلي خرج من المنافسة وفى الآخر بقى البطل، لكن النتيجة الإيجابية هتدي الأهلي دفعة كبيرة، عكس الزمالك، أي نتيجة سلبية هتزود التخبط اللي مستخبي بسبب النتائج الأخيرة.
