رد حسام حسن المدير الفني لمنتخب مصر، على سؤال أحد الصحفيين خلال المؤتمر الصحفي لمباراة مصر والأرجنتين، حول رفع العميد لعلم فلسطين بعد الفوز على أستراليا.
ووجه الصحفي سؤاله لحسام حسن:” رأيناك ترفع العلم الفلسـطيني بعد مباراة مصر وأستراليا ما هو شعورك وهل ستكرر الأمر بعد لقاء الأرجنتين؟”.
ورد العميد:” لو في حد في العالم محسش بالشعب الفلسطيني يبقى مش بني ادم .. ايا كان بقى ده عربي او أوروبي أو غيره”.
وتابع:” حتى الشعوب في أوروبا و أمريكا بتهتم بحقوق الحيوانات لو حد تعرض ليهم “.
وأضاف:” ما بالك بحقوق البني ادم وهما بيتعرضوا للتعدي كل يوم أطفال وستات، احنا شعوب قاعدين في بيوت مكيفة ومعانا الأكل والشرب وفي شعب قاعد في الشوارع ومفيش أكل وشرب”.
وأكمل:” إحنا لو محسناش باللي بيحصل في فلسطين نبقى مش بني ادمين ومينفعش نعيش.. مسلم مسيحي أي ديانه أو أي جنسية”.
واستطرد :”عايز أي حد بيتكلم اقوله فكر تجرب بس تعيش يوم واحد في الشارع مفيش أكل مفيش شرب وفي البرد مش لاقي حاجه تدفي نفسك وفي الصيف مش لاقي حاجه تهوي عليك”.
وأردف:” عار علينا كلنا وعلى العالم كله أنه سايب الشعب الفلسطيني عايش كده والشعوب كلها قاعدة مرتاحه”.
وتابع حسام حسن:” أنا إنسان قبل ما أكون عربي أو مصري والموضوع لا ليه علاقة بالديانه أو الجنسية.. هو موضوع ليه علاقة بالإنسانية”.
واختتم:” احنا من خلال كرة القدم بنبعت رسالة للعالم كله .. ارجوكم خلوا الشعب الفلسطيني يعيش بعد اذنكم خلوهم يعيشوا”.
